Կանադական գիտնականների կողմից մշակված ալգորիթմը դեռ չի կարողանում բացարձակ երաշխավորել հաղթանակը մարդու նկատմամբ յուրաքանչյուր խաղում, քանի որ խաղաթղթերի հերթականությունը պատահական է, սակայն երկարատև խաղի ժամանակ համակարգիչը, միևնույն է, առավելության կհասնի:
Ավելին, նա հաջողությամբ յուրացրել է բլեֆը, սակայն միշտ համարվել է, որ այդպիսի հնարքների ընդունակ է ...միայն մարդը: Մի խոսքով, մասնագետների կարծիքով գիտնականների նորարարությունը բեկումնային է: Կարևորն այն է, որ այս ալգորիթմը կարելի է կիրառել ցանկացած խնդրում, որտեղ տեղեկությունը թերի է, մասնավորապես բժշկության մեջ, հիվանդության ախտորոշման ժամանակ:
Պոկերը համակարգչի համար համարվում է ավելի դժվար խաղ, քան շաշկին և շախմատը: Այդ երկու խաղում ֆիգուրների դասավորվածությունը տեսանելի է, և խաղացողը կարող է մշակել խաղի մարտավարությունը մի քանի քայլ առաջ, իսկ հաշվարկի արագությամբ արհեստական մեքենաները գերազանցում են մարդկանց մի քանի միլիարդ անգամ: Զարմանալի չէ, որ համակարգիչն արդեն վստահորեն հաղթում է շաշկիի և շախմատի աշխարհի չեմպիոններին: Պոկերի դեպքում խնդիրը էապես բարդանում է, քանի որ խաղացողները միմյանց խաղաքարտերը չեն տեսնում, և համակարգիչը ստիպված է ընտրել մարտավարությունը, հիմնվելով թերի տվյալների վրա: Այս խաղում հաղթելու եղանակները բազմաթիվ են:
Ծրագրավորողներն արդեն վաղուց փորձում են հաղթել մարդկանց պոկերում, սակայն մինչ այժմ էական հաջողության չեն հասել: Եվ այսպես, նոր համակարգչային չեմպիոնը ստեղծված է: Հեղինակները նշում են, որ նա ինքնուս է: Նրան ուղղակի ծանոթացրել են խաղի կանոններին, և նա մարզվել է ինքնուրույն: Երկու ամիսների ընթացքում համակարգիչն ինքն իր հետ խաղացել է քսանչորս տրիլիոն խաղ և այժմ գիտի հաղթելու մարտավարությունը խաղաքարտերի ցանկացած տիպի դասավորվածության և հակառակորդի բոլոր պահելաձևերի դեպքում: Առայժմ համակարգիչը մասնագիտացված է ընդամենը մեկ տեսակի խաղի վրա, այն է` Տեխասյան Հոլդեմ, երկու պարտնյորներով և ֆիքսված խաղադրույքներով:
No comments:
Post a Comment